विष्फोटमा संलग्न भएको आशंकामा चितवनबाट विप्लवका दुई कार्यकर्ता पक्राउ
14-March-2019


चितवन, फागुन ३० 

जिल्ला प्रहरी कार्यालय चितवनले विप्लव निकट नेकपाका दुई जना कार्यकर्तालाई पक्राउ गरेको छ। 

चितवनका प्रहरी उपरीक्षक सुशीलसिंह राठौरले बुधबार भरतपुर महानगरपालिका–५ मा भएको विष्फोटमा संलग्न भएको आशंकामा दुई जनालाई नियन्त्रणमा लिइएको बताए। 

विष्फोटलगत्तै प्रहरीले १० जनालाई नियन्त्रणमा लिएको थियो। प्रहरी उपरीक्षक राठौरका अनुसार पक्राउ परेकामध्ये सातलाई साधारण तारेखमा छोडिएको र अन्य तीनलाई थप अनुसन्धानका लागि राखिएको छ। आज थप दुई जना पक्राउ परेको उनले बताए। अनुसन्धान भइरहेकाले नाम गोप्य राखिएको छ। 

सिलिण्डर विष्फोटबाट भवन पूर्णरूपमा क्षति भएको थियो भने विष्फोटपछिको आगजनीले कागजपत्र पुरै जलेको प्रहरीले जनाएको छ।

यस्तै, विप्लव माओवादीले गरेको बन्दका कारण जिल्लाको जनजीवन प्रभावित भएको छ। बन्दका कारण जिल्लास्थित सम्पूर्ण व्यवसायिक प्रतिष्ठान, विद्यालय, बजार बन्द भएको छ। लामो दूरीका यातायात कम चलेका छन्। फाटफुट रूपमा छोटो दूरीका सवारी चलेका छन्। 

बन्दका क्रममा पूर्व पश्चिम राजमार्गमा सवारी रोकिएपछि प्रहरीले स्कर्टिङ गर्दै गन्तव्यमा पुर्याउन थालेको छ। जिल्ला प्रहरी कार्यालय चितवनले मकवानपुर, नवलपरासी, काठमाडौंबाट आएका सवारी र जिल्लाबाट बाहिरिने सवारीलाई स्कर्टिङ गरेको प्रहरी उपरीक्षक राठौरले बताए। 

मकवानपुरबाट आएका सवारीलाई लोथरबाट, नवलपरासीबाट आएका गाडीलाई नारायणी पुलबाट र काठमाडौंबाट आएका सवारीलाई मौवा खोलाबाट प्रहरीले स्कर्टिङ गर्दै गन्तव्यतर्फ पठाइएको उनले बताए। -रासस

Write a Comment

Events
Random Picks