चन्दा नदिँदा कुटिए सुनचाँदी व्यवसायी
5-March-2018

पोखरा, २१ फागुन । 

चन्दा नदिएको भन्दै पोखरामा एक जना सुनचाँदी व्यवसायीलाई नेकपा (माओबादी) विप्लब समूहका कार्यकर्ताहरुले निर्घात कुटपिट गरेका छन् । पोखरा १५ रामबजारका सुनचाँदी व्यवसायी भीम बिकलाई करिब ५ जनाको समूहले कुटपिट गरेर घाईते बनाएका हुन् । 

घाईते बिकको अहिले उपचार भैरहेको प्रहरीले जनाएको छ । पारिवारीक स्रोतका अनुसार बिकलाई नेकपा (माओबादी) बिप्लव समूहका कार्यकर्ताले बारम्बार फोन गरेर १० लाख रुपैयाँ चन्दा दिन दबाब दिँदै आएका थिए । उनीहरुले भनेअनुसार बिकले चन्दा दिन अस्विकार गरेकै कारणले बिप्लव समूहका मानिसहरु उनीमाथि आक्रमणमा उत्रिएको हुन सक्ने प्रहरीको अनुमान छ । 

सोमबार साँझ करिब ७ बजेतिर बिक परिवारसहित खाना खाने तयारीमा थिए । सोहि समयमा एकाएक ५ जनाको समूह बिकको घरमा छिरेर हातपातमा उत्रिएको थियो । कुटपिटका कारण बिकको अनुहारमा चोट लागेको छ । त्यस्तै आक्रमण गर्न आएका बिप्लप समूहका मानिसहरुले बिकको आमामाथि पनि हातपात गरेको प्रहरीले जनाएको छ । छोरालाई नकुट्न भन्दै बीचमा छिरेकी आमा उजेली कुमारी बिकको हात काटेको र उनको अवस्था सामान्य रहेको प्रहरीले जनाएको छ । आक्रमणकारीहरुले खुकुरी लिएर आक्रमणमा उत्रिएको बिकले बताए । 

नेकपा (माओबादी)  बिप्लव समूहका कार्यकर्ताले बिकलाई दलितको नाममा विदेशबाट पैसा ल्याएर एक्लैले खाएको आरोप लगाएका थिए । यद्यपी उनीहरुको आरोप निराधार भएको भीम बिक बताउँछन् । 

‘म नेपाली काँग्रेसको राजनीतिक विचारधारासँग नजिक छु । तर उनीहरुले पहिल्यैदेखि आफ्नो पार्टीको सदस्य बन्न र आर्थिक सहयोग गर्न दबाब दिँदै आएका थिए । तर मैले मानिन । त्यहि भएर उनीहरु म माथि यसरी खनिएका हुन सक्छन् ।’ घाईते व्यवसायी भीम बिकले भने–‘म र मेरो परिवारका लागि एकदमै खतरा भएका छन् उनीहरु । मेरो जीवन रक्षाको लागि म प्रशासनसमक्ष आग्रह गर्दछु ।’ लोकतन्त्रमा आफ्नो राजनीतिक चिन्तनअनुसारको पार्टी रोज्न पाउने अधिकार भएकोले बिप्लव समूहले यस्तो घिनलाग्दो हर्कत गर्न नहुने बिकले बताए । 

घाईते बिकलाई अझै पनि सो समूहबाट धम्कीपूर्ण फोन आईरहेको उनकी श्रीमती कुमारी बिकले बताईन् । ‘पैसा कुनै पनि हालतमा दिनुपर्ने भन्दै अझै उनीहरुले धम्काईरहेका छन् । हामी सामान्य व्यापार गरेर बस्नेले त्यत्रो पैसा कहाँबाट ल्याएर दिनु ?’ कुमारीले प्रतिप्रश्न गरिन् । कुमारीले आफ्नो परिवारका सदस्यहरुको ज्यानको खतरा भएको भन्दै चिन्ता व्यक्त गरिन् । 

यसैबीच बिकमाथि भएको साँघातिक हमलाको नेपाली काँग्रेस कास्कीले भत्र्सना गरेको छ । पार्टीले विज्ञप्ती जारी गर्दै लोकतन्त्र प्राप्ति पछि पनि यस्तो खाले घृणित राजनीति गर्न खोज्नु लोकतन्त्रको विरुद्धमा जानु भएको बताउँदै पीडित परिवारलाई सुरक्षाको प्रत्याभूति दिलाउन प्रशासनसमक्ष माग गरेको छ । त्यस्तै नेपाली काँग्रेस सम्बद्ध नेपाल दलित संघले पनि घटनाको विरोध जनाउँदै घटनाको उचित छानविनको माग गरेको छ । त्यसैगरि नेपाल सुनचाँदी व्यवसायी संघले पनि विज्ञप्ती जारी गर्दै दोषीलाई तत्काल कारबाहिको दायरामा ल्याउन पनि प्रशासनसमक्ष आग्रह गरेको छ । 

Write a Comment

Events
Random Picks