पोखरामा फेला परेको रुसी परिवारलाई स्वदेश फर्काइँदै
10-January-2019

जक्सन डटकम
पोखरा, पुष २६

अध्यागमन विभागको हिरासतमा रहेको रुसी परिवारका सबै ४ जनालाई पुसभित्र स्वदेश फर्काइने भएको छ।

गत २६ मंसीरमा पोखरा-६ खहरेखोलाबाट पक्राउ परेका खामोव दिमित्री (४६), उनकी श्रीमती कोभालिन्को भेलिरिया (२६), कोभिलिन्को बोग्दान (३) र इमेलिन (११ महिना) लाई पुसभित्र रुसमै ‘डिपोर्ट’को प्रकृया अगाडि बढाइएको विभागका प्रवक्ता विष्णु उपाध्यायले जानकारी दिए।

१२ अप्रिल २०१६ मा पर्यटक भिसामा काखे छोरो कोभिलिन्को बोग्दान लिएर नेपाल छिरेका रुसी दम्पत्तीले ११ महीनाअघि दोस्रो सन्तान इमेलिनलाई पोखरामा जन्म दिएका थिए।

पोखरा आसपासमा होटल र कृषि मजदूरी गरेर पालिएको परिवारलाई शंकास्पद ठानी गाउँलेले खबर गरेपछि उनीहरूलाई प्रहरीले पक्राउ गरेको थियो। उनीहरूको नेपाल बसाईको ओभर स्टे (भिसा म्याद नाघेपछिको बसाइ) ९७७ दिन भएको विभागले जनाएको छ। त्यसअनुसार उनीहरूले जनही ४ हजार ८८५ डलर जरीवाना तिर्नुपर्नेछ। राहदानी नभएका कारण कान्छा छोरा इमेलिनले भने जरीवाना तिर्नु पर्दैन।

अध्यागमन कानूनअनुसार भिसाको म्याद गुजारेर नेपाल बस्दा जनही प्रतिदिन ५ अमेरिकी डलर जरिवाना लाग्छ। त्यस्ता व्यक्तिलाई कारवाहीपछि उनीहरूको देश ‘डिपोर्ट’ गर्ने गरिन्छ।

Write a Comment