देउसेलाई तर्साउन हेटौंडाका मेयरले राइफल देखाए !
21-October-2017

३ कात्तिक, काठमाडौं । हेटौंडा उपमहानगरपालिकाका मेयर हरिबोल महतले बिहीबार साँझ हेटौंडामा भैलो खेलिरहेको टोलीलाई बन्दुक देखाएर तर्साएका छन् । मदिरा सेवन गरेका मेयरले भैलो टोलीका सदस्यलाई कुटपिटसमेत गरेका छन् ।

बिहीबार राति पौने १२ बजे हेटौंडाको सिँचाइ टोलमा देउसी भैलो खेलिरहेका स्थानीय समूहलाई मेयरले बन्दुक देखाएका हुन् ।

 

सिँचाइ टोल महतको आफ्नै घर भएको टोल हो । स्थानीय राज्यकुमारी चौंलागाइँको घरमा भैलो खेलिरहेका करिब २५ जनाको समूहमाथि महतले बन्दुक देखाएका हुन् । घरधनी चौंलागाई आफैं पनि पूर्वप्रहरी हवल्दार हुन् ।

गेटमा लात्तले हान्दै कम्पाउण्डभित्र छिर्न खोजेका मेयर महतले सुरुमा गेट खोल्न नसकेपछि गेटको प्वालबाट बन्दुकको नाल भित्र छिराएका थिए ।

भित्र गएर पनि मेयर महतले ‘राइफल’ देखाएपछि भैलो खेल्नेहरुको भागाभाग भएको स्थानीयले बताए । महतले मादक पदार्थ सेवन गरेका कारण नै घटना भएको उनीहरुको आरोप छ ।

घटनामा महतले १७ वर्षीय सुनिल राईलाई कुटपिट गर्दै देउसे टोलीले लगेका स्पीकरसमेत तोडफोड गरेको प्रत्यक्षदर्शीको भनाइ छ ।

मेयर भन्छन्-मसँग बन्दुक छ, तर देखाएको होइन

मेयर महतले अनलाइनखबरलाई प्रतिक्रिया दिँदै रातको १२ बजेसम्म देउसी खेलेको भन्दै आफूले सो समूहलाई सचेत गराएको बताए । ‘मसँग राज्यबाट लाइसेन्स लिएको बन्दुक छ, मेरो गाडीमा त्यो बन्दुक हुन्छ । सुरक्षाका लागि मैले बन्दुक बोक्छु’ महतले भने, ‘ तर, मैले प्रचार गरिएजस्तो बन्दुक देखाएको भने होइन ।’

मेयर महतले घटनालाई राजनीतिकरण गरिएको आरोप लगाए ।

महतले राति अबेरसम्म हो-हल्ला गरेकाले उनीहरुलाई सचेत गराइएको बताए । राति १० बजेपछि देउसी खेल्न नपाइने महतले बताए ।

मेयर महतले बन्दूक देखाएको भनिएको घटनाबारे आफूले पनि सुनेको मकवानपुरका प्रहरी उपरीक्षक विकास खनालले बताए । तर, कसैले उजुरी नदिएकाले अनुसन्धान अघि नबढेको उनको भनाइ छ ।

माफी माग्न स्थानीयको माग 

स्थानीयले भने आफ्नै गाउँको घटना भएकाले प्रहरीसम्म नगएको भन्दै मेयरले आफूहरुसँग आएर माफी माग्नुपर्ने बताएका छन् ।

तर, स्थानयीले भने घटनामा महतले गरेको दुब्र्याबहारको भिडियो आफुहरुसँग सुरक्षित रहेको भन्दै मेयरको भनाइको खण्डन गरेका छन् ।

महतले देउसी खेलिरहेकाहरुलाई गालीगलौज गर्दै दुब्र्यबहार पनि गरेको स्थानीयले आरोप लगाएका छन् ।

उनले घटना भएकोमा माफी माग्नुको साटो उल्टो विभिन्न व्यक्तिहरु पठाएर डर देखाइरहेको भन्दै आलोचना गरेका छन् ।
देउसी खेल्ने टिममै रहेकी एक युवतीले आफ्नो फेसबुक वालमा लेखेकी छिन, ‘सदियौंदेखि चलीआएको मौलिक परम्परा र संस्कृति टिकाइराख्ने र जगेर्ना गर्ने हेतुले आफ्नो घरगाउँमा सांस्कृतिक कार्यक्रममा रमाइरहेका महिला समूहलाई गाली बेइज्जती, बालबालिकालाई कुटपिट साथै बन्दुक देखाई मार्ने धम्कीसमेत दिई उफर तोडफोड र गेटमा लातीले हानी तोडफोड गर्ने कार्य जनताबाटै चुनिएर उच्च अहोदामा रहेका व्यक्ति उपमहानगरपालिकाका मेयर हरिवोल महतले गर्नुभएको यस्तो निंदनीय कार्यलाई हजुरहरूले कुन रूपमा लिनुहुन्छ ?’