गणेश थापामाथि हेटौंडामा खुकुरी प्रहार
21-July-2015

हेटौंडा, साउन ५ 

कमल थापाका छोरा अभिषेक पनि घाइते

राप्रपा नेपालका सभासद गणेश थापामाथि संविधानको मस्यौदा सुझावका क्रममा हेटौडामा खुकुरी प्रहार भएको छ ।

सुझाव संकलनका क्रममा विरोध गर्न त्यहाँ पुग्दा आफूमाथि युवाहरुको एक समूहले खुकुरी र रड प्रहार गरेको थापाले जानकारी दिए। थापाको टाउकोमा चोट लागेको छ । सुझाव संकलनका क्रममा हिन्दु राष्ट्रको पक्षमा बोल्न लाग्दा उनीमाथि आक्रमण भएको राप्रपा नेपालले जनाएको छ ।

 

हिन्दु राष्ट्र कायम गर्ने सवालमा आफूले जस्तोसुकै परिणाम भोग्न तयार रहेको थापाले बताए । थापाको अहिले हेटौंडा अस्पतालमा उपचार भइरहेको छ । आफूमाथि नियोजित रुपमा नै आक्रमण भएको थापाले बताए । झडपमा कमल थापाका छोरा अभिषेक थापा पनि घाइते भएका छन् । कांग्रेस, एमाले र एकीकृत माओवादीका कार्यकर्ताहरुले आफूलाई आक्रमण गरेको अभिषेकले सेतोपाटीलाई बताए ।

 

मकवानपुर प्रहरीले भने थापामाथि खुकरी प्रहार भएको बारे थाहा नभएको बताएको छ । मकवानपुर एसपी प्रकाशजंग कार्कीले सुझाव संकलनका क्रममा कमल थापा र गणेश थापा लगायतका आएर अवरोध गरेका कारण झडप भएको बताए ।

 

अन्य दलका कार्यकर्ता र राप्रपा नेपालका कार्यकर्ताबीच झडप भएको प्रहरीले जनाएको छ । हिजो मकवानपुरकै हटियामा भएको सुझाव संकलन कार्यक्रममा झडप हुदाँ अध्यक्ष कमल थापाकी पत्नी प्रलिता घाइते भएकी थिइन् । अखिल नेपाल फुटवल संघका अध्यक्ष समेत रहेका थापा कमल थापाका भाइ हुन् ।

source:setopati

http://setopati.com/raajneeti/31103/

Write a Comment

Events
Random Picks