फ्रान्स भर्सेज क्रोएसिया : यस्ता छन् विश्व बिजेता बन्न सक्ने ४ कारण
15-July-2018

फ्रान्स भर्सेज क्रोएसिया : यस्ता छन् विश्व बिजेता बन्न सक्ने ४ कारण


पहिलोपटक सन् १९९८ मा विश्वकपमा सहभागी हुँदा नै सेमिफाइनलसम्म पुगेको क्रोएसियाले यसपटक फाइनलमा पुग्दै इतिहास बनाएको छ ।

आइतबार राति पौने ९ बजे हुने खेलमा  फ्रान्सलाई हराउन सके विश्वकप विजेतामा नयाँ राष्ट्रको नाम चढ्नेछ ।

उत्कृष्ट मिडफिल्डसँगै राम्रो फिनिसिङ देखिएको क्रोएसियन टिमले विश्व फुटबलकै आयाममा विशेष प्रभाव पारेको छ ।

जर्मनी, अर्जेन्टिना, स्पेन, ब्राजिल जस्ता आश गरिएका टिमहरु निराश भएका बेला क्रोएसिया एकपछि अर्को जितको खुसी मनाउँदै छ ।

क्रोएसियाले समूह चरणमा नाइजेरियालाई २-०, अर्जेन्टिनालाई ३-० र आइसल्याण्डलाई २-१ ले हराएको थियो । अन्तिम १६ मा डेनमार्कसँग १-१ को बराबरीपछि टाइब्रेकरमा ३-२ ले विजयी भएको क्रोएसिया क्वार्टरफाइनलमा पनि टाइब्रेकरमै विजयी भएको हो ।

क्वार्टरफाइनलमा रसियासँग २-२ को बराबरीपछि टाइब्रेकरमा क्रोएसिया ४-३ ले विजयी भएको थियो । सेमिफाइनलमा बलियो मानिएको इंग्ल्याण्डलाई २-१ ले हराएको थियो ।

फाइनलमा क्रोएसियाले फ्रान्सलाई हराउन सक्ने आधार के छन् त ?

चमत्कारी टिम र प्रेरणा

क्रोएसियाका प्रशिक्षक जाल्ट्को डेलिकले उत्कृष्ट काम गरेका छन् । टिमको वातावरण अहिलेजस्तो राम्रो पहिले थिएन ।

यही कुरा खेलाडीहरुले पनि बारम्बार भन्ने गरेका थिए । रसिया विश्वकपमा अहिले उनीहरुले परिवारको वातावरण पाएका छन् । उनीहरु ५० दिनभन्दा अघिदेखि साथैमा छन् । खेलाडी मैदानमा एकअर्काका लागि ज्यान दिएर खेल्छन् । लगातार तीन खेलमा अतिरिक्त समयसम्म खेल्दा पनि उनीहरुले सामूहिक रुपमा जित निकाल्न प्रयासरत थिए ।

मनोविज्ञान र आचरण

डेनमार्क, रसिया र इंग्ल्याण्ड यी तीन देश हुन्, जसले सुरुमा अग्रता लिएर पनि हार बेहोरे । यी तीनै देशसँग सुरुमा पछि परेर पनि जित निकाल्ने टिम क्रोएसिया नै हो । डेनमार्क र रसियासँगको खेल क्रोएसियाले टाइब्रेकरमा जित्यो ।

इंग्ल्याण्डसँगको खेलमा भने अतिरिक्त समयको गोलले जित निकाल्न सफल भयो । क्रोएसिया ‘कमव्याक किङ’ को रुपमा उदाएको छ । यसमा खेलाडीले देखाएको मनोवैज्ञानिक तथा शारीरिक सबलताको भूमिका महत्वपूर्ण छ ।

कप्तान लुका मोडरिकले बारम्बार भन्ने गरेका छन्, ‘हामीले हाम्रो आचरण प्रस्तुत गरेका छौं ।’ क्रोएसियाको यही असल आचरण फ्रान्ससँगको फाइनलमा काम लाग्ने छ ।

अनुभव र आत्मविश्वास

मोडरिक क्रोएसियाको उत्कृष्ट पुस्ताको नेतृत्वमा छन् । रियल मडि्रडका मोडरिकसँगै बार्सिलोना, इन्टर मिलान, युभेन्टस र लिभरपुलका खेलाडीहरु पनि क्रोएसियन टिमको साथमा छन् ।

इभान र्‍याकिटिक, मारियो मान्जुकीज, इभान पेरिसिक, माटेओ कोभासिक र डिजेन लोभरेनले उत्कृष्ट खेल देखाइरहेका छन् । टिममा रहेका खेलाडीको औसत उमेर २७ वर्ष १० महिना छ । जसमा अनुभव सँगै आत्मविश्वास बलियो छ ।

बलियो मिडफिल्ड

क्रोएसियन टिमको प्रमुख जितको आधार मिडफिल्डबाट नै बनेको देख्न सकिन्छ । अहिले विश्व फुटबलमै उत्कृष्ट रहेका इभान र्‍याकिटिक र लुका मोडरिकले मिडफिल्डबाट क्रोएसियन टिमको अग्रता बनाइरहेका छन् ।

मिडफिल्डसँगै अट्याकिङ लाइन पनि रचनात्मक, संगठित र संरचित लाग्छ । उनीहरुको खेलमा अरु खेलाडीले पनि तालमेल मिलाइसकेका छन् । उनीहरुसँगै मिडफिल्डमै इन्टर मिलानका मार्सेलो ब्रोजोभिकले पनि गजवको काम गरिरहेका छन् ।

रियल मड्रडकै माटेओ कोवासिक, फिरोन्टेनियाका मिलान बडेल्ज सबै नै क्रोएसियन फुटबल इतिहासकै उत्कृष्ट पुस्ता हुन् ।

विश्वकप फुटबलको फाइनलमा पुग्नुअघि नै टिमले हरेक अवस्थाको सामना गरिसकेको हुन्छ । समूह चरणदेखि बलियो देखिँदै आएको फ्रान्स पनि फाइनलसम्म पुग्दा नयाँ लयमा देखिएको छ ।

सबै खेल हेर्दा फ्रान्सले विश्वकप उपाधि दोस्रो पटक उचाल्ने बलियो आधारहरु देखिन्छन् । फ्रान्सका प्रशिक्षक डिडिएर डेसच्याम्प्सले टिममा उस्तै खाले खेलाडी राखेको र फरकपना नदेखिएको भनेर आलोचना खेपेको धेरै भएको छैन । धेरैले त फ्रान्समा फुटबलका हजारौं प्रतिभा छन् तर परख भएको छैन भनिरहेका हुन्थे ।


त्यो आलोचना यसपटक रसिया विश्वकपमा तोडिएको छ । अर्जेन्टिनासँगको खेल हेरौं या उरुग्वेसँगको पर्फर्मेन्स  टिम उत्कृष्ट थियो । के त्यसो भए यसपटक खेलाडी फरक भएर हो त ? होइन, सबै उस्तै नै हुन् । तर, खेल्ने तरिका भने फ्रान्स टिमले फरक बनाएको छ ।

फ्रान्सले समूह चरणमा अस्टे्रलियालाई २-१, पेरुलाई १-० ले हराएको थियो भने डेनमार्कसँग गोलरहित बराबरी खेेलेको थियो ।

अन्तिम १६ मा अर्जेन्टिनालाई ४-३ ले हराएको फ्रान्सले क्वार्टरफाइनलमा उरुग्वेलाई २-० ले हराएको थियो । सेमिफाइनलमा लयमा देखिएको बेल्जियमलाई १-० ले हराएको थियो ।

दृढता

डिफेन्स र फरवार्ड लाइन दुवैमा फ्रान्स टिमले निकै राम्रो काम देखाइरहेको छ । तथ्यांकलाई मात्रै हेर्ने हो भने पनि त्यो कुरा बुझ्न सकिन्छ । विश्वकपमा सबै खेलमा फ्रान्स पछाडि परेको भनेको ९ मिनेट मात्रै हो ।

विश्वकपमै सबैभन्दा बढी डिफेन्स लाइनमा बल पोसेसन मिलाउने फ्रान्सकै एन्जेलो कान्टे हुन् । उनले ४८ पटक बल पोसेसन मिलाएका छन् । गोलकिपर हृयुगो लोरिसले पनि पोस्टको दिशामा आएका पछिल्ला सात प्रहार बचाएका छन् ।

विश्वकपमा कम्तीमा १० खेल खेलाएका प्रशिक्षकलाई हेर्ने हो भने पनि फ्रान्सका प्रशिक्षक डिडिएर डेसच्याम्प्सको जितको प्रतिशत अरुको भन्दा बढी छ । पछिल्लो ११ खेलमा उनीहरुले ८ खेल जितेका छन् ।

सामूहिक साझेदारी

‘विश्वकपले प्रतिभालाई देख्दैन, टिमलाई मात्रै देख्छ’ बेल्जियमका प्रशिक्षक रोबर्टो मार्टिनेजले फ्रान्ससँग सेमिफाइनल खेल हारेपछि उनीहरुको सामूहिक साझेदारीको तारिफ गर्दै भनेका थिए ।

पहिलो त, महत्वपूर्ण खेलमा कुनै एक खेलाडी मात्रै पनि चम्केर गोल गर्दै टिमलाई जित दिलाउन सक्छन् । तर, त्यसमा एक्लो बलले भने केही हुँदैन । सबैसँगको तालमेल निकै आवश्यक हुन्छ ।

फ्रान्स टिममा हेर्दा हरेक एक्लो खेलाडी उत्कृष्ट लाग्छन् । त्यससँगै उनीहरुले गजबको तालमेल पनि मिलाएका हुन्छन् । त्यतिमात्रै होइन तेस्रो रोजाईका गोलकिपरदेखि सेक्युरिटीसम्म, सुरुवाती ११ का खेलाडीदेखि सहायक प्रशिक्षकसम्म सबैले जितका लागि उस्तै मेहनत गरेका छन् ।

बहुमुखी क्षमता

विपक्षी टिम बुझेर कोविरुद्ध कसरी खेल्ने भन्ने फ्रान्स टिमले राम्ररी बुझेको छ । त्यही नै उत्कृष्ट विशेषता हो । विपक्षी अनुसार खेल खेलेर चाहेको जस्तो काम दिन सक्ने खुबी फ्रान्सको टिममा देखिएको छ । फ्रान्सले एउटा खेल ४-३-३ को शैलीमा र अर्को खेल ४-२-३-१ को शैलीमा पनि उस्तै राम्ररी खेल्न सक्छ ।

यो विश्वकपका खेल हेर्दा हामीले बुझ्नुपर्ने कुरा के हो भने, विश्वकपमा कुनै पनि टिम कमजोर थिएनन् र छैनन् पनि । बल धेरैबेर पास खेलेर वा छल्लाएर पनि जित मिल्दैन । अनुभवि र चलेका खेलाडी भएर पनि जित मिल्दैन । कसरी मिल्छ त ? त्यसका लागि हरेक कुरा चाहिन्छ । खेलअनुसार ती कुरा प्रयोग गर्नुपर्छ । जुन फ्रान्सले गरिरहेको छ ।

इतिहास

फ्रान्सले विश्वकप जितेको २० वर्ष भइसकेको छ । एकपटक मात्रै विश्वकप जिते पनि हरेक पटक उत्कृष्ट दाबेदारी पेश गर्ने फ्रान्स टिम बलियो मनस्थितिमा हुन्छ । क्रोएसियालाई हराउन सके प्रशिक्षक डेसच्याम्प्स खेलाडी र प्रशिक्षकका रुपमा विश्वकप जित्ने तेस्रा खेलाडी हुने छन् ।

यसअघि ब्राजिलका मारियो जागालो र जर्मनीका फ्रान्ज बेकेनबेउरले खेलाडी र प्रशिक्षकका रुपमा विश्वकप जितेका थिए । अहिलेसम्म १४ पटक विश्वकप खेलेको फ्रान्स सन् १९९४ यताका सबै विश्वकपमा सहभागी हुँदै आएको छ । गएको विश्वकपमा क्वार्टरफाइनलसम्म पुगेको थियो । फ्रान्स दुई पटक फाइनलसम्म र पाँच पटक सेमिफाइनलसम्म पुगेको छ ।

Write a Comment

Events
Random Picks