स्पेन क्रोएसियासँग पराजित, अन्तिम १६ मा इटली प्रतिद्वन्द्वी
21-June-2016

युरो कप २०१६ को समूह चरणमा साविकको विजेता स्पेन क्रिएसियासँग पराजित भएको छ । र, अन्तिम १६ मा इटली प्रतिद्वन्द्वी पाएको छ ।

बुधबार विहान भएको खेलमा क्रोएसियाले स्पेनलाई २-१ गोल अन्तरले पराजित गरेको छ । जितसँगै ७ अंकका साथ समूह डीको विजेता बनेको क्रोएसियाले नकआउट चरणमा इटलीलाई छलेको छ ।

तर, स्पेनको ६ अंक छ । र, समूह उपविजेता बनेको छ । उसले अन्तिम १६ मा समूह ईको विजेता इटली प्रतिद्वन्द्वी पाएको छ ।

खेलमा स्पेनले सातौं मिनेटमा नै मोराटाको गोलबाट अग्रता लिएको थियो । तर, जोगाउन सकेन । पहिलो हाफको अन्तिममा क्रोएसियाका कलिनिकले बराबरीमा गोल फर्काए ।

खेलको ७२ औं मिनेटमा स्पेनले पेनाल्टी पाएको थियो । तर, सर्जिओ रामोस गोल गर्न असफल रहे । उनको प्रहार विपक्षी किपरले रोके ।

८७ औं मिनेटमा पेरिसिकले गोल गर्दै क्रोएसियालाई २-१ को जित दिलाए । यससागै स्पेनको युरोपियन च्याम्पियनसिपमा १५ खेलको अपराजित यात्रा टुंगिएको छ ।